Hazırda film çəkilişləri ilə bağlı Bakıda olan və xüsusilə sosial mediada trendləşən dünyaca məşhur aktyor, döyüş ustası və prodüser Ceki Çan təkcə filmləri ilə deyil, həyat hekayəsi ilə də diqqət çəkir.
O, illərdir kino dünyasının ən sevilən simalarından biri olsa da, haqqında çoxlarının bilmədiyi maraqlı məqamlar var.
İctimai.az həmin maraqlı faktları sizə təqdim edir:
1. Əsl adı Ceki Çan deyil
Aktyorun əsl adı Çan Konq-Sanqdır (Chan Kong-sang). O, 7 aprel 1954-cü ildə Honq Konqda anadan olub.
2. İlk illərdə Brüs Linin filmlərində çalışıb
Karyerasının əvvəlində Ceki Çan Brüs Linin çəkildiyi filmlərdə kaskadyor və dublyor kimi çalışıb. Sonradan isə öz üslubunu formalaşdıraraq dünya şöhrəti qazanıb.
3. Təhlükəli səhnələri özü canlandırır
Ceki Çan filmlərindəki riskli səhnələrin böyük əksəriyyətini dublyorsuz ifa edir. Məhz buna görə o, dəfələrlə müxtəlif xəsarətlər alıb.
4. Döyüş səhnələrinin quruluşunu özü hazırlayır
Aktyor yalnız rol almaqla kifayətlənmir, eyni zamanda filmlərindəki döyüş səhnələrinin xoreoqrafiyasını da özü hazırlayır.
5. Ördəklərdən qorxur
Məlumata görə, uşaqlıqda ördək tərəfindən dişləndiyi üçün aktyorun bu quşlara qarşı xüsusi qorxusu var.
6. Bahalı avtomobillərin həvəskarıdır
Onun şəxsi kolleksiyasında Ferrari, Lamborghini, Porsche və digər lüks markalara məxsus avtomobillər yer alır.
7. Fəxri “Oskar” mükafatı alıb
Ceki Çan 2016-cı ildə kino sənətinə verdiyi töhfələrə görə Akademiyanın Fəxri “Oskar” mükafatına layiq görülüb.
8. Musiqi ilə də məşğuldur
Aktyor filmlər üçün mahnılar ifa edib, həmçinin müxtəlif musiqi albomları da buraxıb.
9. Xeyriyyəçilik fəaliyyəti ilə seçilir
O, uzun illərdir uşaqların təhsili və sosial layihələrin dəstəklənməsi istiqamətində xeyriyyəçilik fəaliyyəti göstərir.
10. Qədim Çin incəsənətini kolleksiya edir
Ceki Çan qədim Çin sənət nümunələrinin toplanmasına xüsusi maraq göstərir və zəngin şəxsi kolleksiyaya malikdir.
11. Dünya şöhrətinə 40 yaşından sonra qovuşub
Ceki Çan gənc yaşlarından filmlərdə rol alsa da, beynəlxalq səviyyədə tanınması və Hollivudun ən məşhur aktyorlarından birinə çevrilməsi 40 yaşından sonraya təsadüf edib. Xüsusilə 1995-ci ildə nümayiş olunan Rumble in the Bronx filmi onun dünya miqyasında məşhurlaşmasında dönüş nöqtəsi sayılır.
