ABŞ Vətəndaşlıq və İmmiqrasiya Xidmətinin (USCIS) mətbuat xidməti X sosial media platformasında bəyan edib ki, ABŞ hakimiyyəti Vaşinqtonun mərkəzində atışma baş verdikdən sonra Əfqanıstan vətəndaşlarının bütün immiqrasiya müraciətlərinə baxılmasını müvəqqəti dayandırıb.
“Əfqan vətəndaşlarının iştirak etdiyi bütün immiqrasiya sorğularının icrası təhlükəsizlik və yoxlama protokollarının sonrakı nəzərdən keçirilməsini gözləyərək dərhal və qeyri-müəyyən müddətə dayandırılır”, – bəyanatda deyilir.
Mətbuat xidməti qeyd edib ki, Amerika vətəndaşlarının müdafiəsi və ölkənin təhlükəsizliyi agentliyin əsas prioritetləridir.
Noyabrın 26-da, təxminən saat 14:20-də Vaşinqtonda, Ağ Evdən bir qədər aralıda atışma baş verib, iki Milli Qvardiya əsgəri yaralanıb. Şübhəli saxlanılıb, Ağ Ev mühasirəyə alınıb.
