Bloomberg öz mənbələrinə istinadən xəbər verir ki, ABŞ Maliyyə Naziri Skott Bessent və Federal Ehtiyat Sisteminin sədri Jerom Pauell Anthropic PBC-nin yeni süni intellekt (Sİ) modelinin yaratdığı potensial kibertəhdidlər səbəbindən ölkənin ən böyük banklarının rəhbərlərini təcili iclas üçün toplayıblar.
Nəşrin məlumatına görə, ABŞ hakimiyyəti bankların yeni Claude Mythos Sİ modeli ilə əlaqəli potensial risklərdən xəbərdar olmasını və sistemlərini qorumaq üçün tədbirlər görməsini təmin etmək istəyir.
Bloomberg qeyd edir ki, 7 apreldə ABŞ Maliyyə Nazirliyinin Vaşinqtondakı qərargahında keçirilən tələsik təşkil olunmuş görüş tənzimləyicilərin bu yeni tip kiberhücumu ABŞ maliyyə sənayesi üçün ən böyük təhdidlərdən biri kimi qəbul etməsinin əlamətidir.
