Bloomberg xəbər verir ki, Birləşmiş Ştatlar Avropa Komissiyasının (AK) Ukraynanı maliyyələşdirmək üçün dondurulmuş Rusiya aktivlərini müsadirə etmək planının qarşısını almaq üçün Avropa İttifaqına (Aİ) üzv ölkələrlə işləyir.
Agentliyin məlumatına görə, Amerika tərəfi döyüşləri davam etdirməkdənsə, Ukraynada sülhə nail olmaq üçün Rusiyanın aktivlərindən istifadə etməkdə israrlıdır. Vaşinqton hesab edir ki, bu vəsaitlər sonradan ABŞ-ın nəzarəti altında Ukraynaya müharibədən sonrakı investisiyaların bir hissəsi kimi istifadə oluna bilər.
Dekabrın 3-də AK İdarə Heyəti Rusiyanın dondurulmuş aktivlərindən özgəninkiləşdirilməsi əvəzinə Ukraynaya “potensial reparasiya krediti”nin verilməsini təsdiqləyib. Avropa Komissiyasının sədri Ursula fon der Leyenin sözlərinə görə, Ukraynaya döyüşləri davam etdirmək və dövlətin fəaliyyətini saxlamaq üçün 2027-ci ilin sonuna kimi 135 milyard avro lazımdır. Buna görə də regional blok Rusiya aktivlərinin müsadirəsinə alternativ təklif etdi: Kiyevin ehtiyaclarının üçdə ikisini ödəyəcək 90 milyard avroluq kredit.
