ABŞ, Ukraynadakı münaqişəyə baxmayaraq, maraqlarının kəsişdiyi müəyyən sahələrdə Rusiya ilə əməkdaşlıq edə bilər. ABŞ-ın vitse-prezidenti Ceyms Devid Vens bunu jurnalist Meqqi Kelli ilə müsahibəsində bildirib.
“İnsanlar ‘Ukraynanın işğalı ilə razılaşmadığınız üçün Putinlə işləyə bilməzsiniz’ deyəndə, prezident açıq şəkildə ‘Putin Ukraynaya hücum etməməli idi. Biz bunun qarşısını almaq üçün çalışacağıq, amma əməkdaşlıq sahələri də ola bilər’ deyə cavab verir”, – Vens bildirib.
Onun sözlərinə görə, bu mövqe Prezident Donald Trampın xarici siyasətə yanaşması ilə uyğundur, bu yanaşma praqmatizm və milli maraqlara əsaslanır. Siyasətçi əmin edib ki, Amerika lideri dünyanı “dostlar” və “düşmənlər”ə bölmür, əksinə müəyyən ittifaqlar və maraqlarla işləyir.
“Əksər məsələlərdə bir ölkə ilə razılaşmaya bilərsiniz, amma yenə də müəyyən məsələlərdə ortaq məxrəc axtara bilərsiniz. Trampın yanaşmasındakı əsas fərq, münaqişələrə son qoymaq üçün bir vasitə olan hər kəslə danışmağa hazır olmaqdır”, – Vens deyib.
