Alimlər keçəlliyə qarşı effektiv müalicə üsulu yaratmaq istiqamətində daha bir addım atıblar. Tədqiqatçılar ilk dəfə olaraq laboratoriyada təbii saç böyüməsi dövrlərindən keçən funksional saç follikullarını uğurla yetişdiriblər. İş Biochemical and Biophysical Research Communications (BBRC) jurnalında dərc edilib.
Tədqiqatda ABŞ və Yaponiyadan olan alimlər iştirak ediblər. Təcrübələr siçanlar üzərində aparıldığı üçün texnologiyanın insanlara tətbiq olunması hələ çox uzaqdır. Buna baxmayaraq, nəticələr saç bərpası metodlarının hazırlanması üçün yeni imkanlar açır.
İndiyə qədər alimlər laboratoriyada saç follikulunun rudimentlərini yetişdirə biliblər. Lakin bu strukturlar tam inkişaf edə və toxuma ilə əlaqə qura bilməyiblər. Onlar yalnız heyvanların dərisinə köçürüldükdən sonra normal fəaliyyət göstərməyə başlayıblar.
Yeni tədqiqat göstərib ki, tam funksional follikulun əmələ gəlməsi üçün üç hüceyrə növünün kombinasiyası tələb olunur. Əvvəlki tədqiqatlarda iki əsas növdən istifadə olunub: saç əmələ gətirən epitel kök hüceyrələri və böyümə siqnalı verən dermal papilla hüceyrələri.
