Belarus prezidenti Aleksandr Lukaşenko Rusiya ilə sazişin tərkib hissəsi kimi regional qoşun qruplarının fəaliyyəti ilə bağlı protokolun ratifikasiyası haqqında qanunu təsdiqləyib.
TASS yazır ki, bu sənəd Milli Hüquq İnternet Portalında dərc olunub.
“Hərbi sahədə regional təhlükəsizliyin birgə təmin edilməsi haqqında 19 dekabr 1997-ci il tarixli sazişə dəyişiklik edilməsi haqqında Belarus Respublikası ilə Rusiya Federasiyası arasında 2022-ci il dekabrın 3-də Minsk şəhərində imzalanmış protokolun ratifikasiya edilməsi qərara alınıb. ”, – sənəddə deyilir.
Bundan əvvəl Belarus deputatları Rusiya ilə döyüş hazırlığı mərkəzləri haqqında sazişi ratifikasiya ediblər. Nümayəndələr Palatasının Beynəlxalq Əlaqələr Komissiyası qeyd edib ki, bu saziş iki ölkənin silahlı qüvvələrinin hərbi hissələrinin bazasında birgə təlimlərin keçirilməsi üçün döyüş hazırlığı mərkəzlərinin yaradılması və fəaliyyətinin təşkili ilə bağlı məsələləri tənzimləyir.