Rio-de-Janeyrodakı narkotik kartelləri polisə qarşı bomba ilə təchiz edilmiş dronlardan istifadə edir. Hadisənin videosunu Braziliyanın G1 Globo xəbər agentliyi yayıb.
Hesabatda bildirilir ki, Alemão və Penha favelalarında yerləşən qanqsterlər Rio-de-Janeyronun elit Mülki Polisinin hüquq-mühafizə orqanlarının əməkdaşlarına bomba atmaq üçün dronlardan istifadə ediblər. Ştat qubernatoru Klaudio Kastro şəhərdə baş verən hadisələri narkotik terrorizm adlandırıb. O, hakimiyyətin geri çəkilməyəcəyini və narkotik alverçilərinə qarşı bütün lazımi tədbirləri görəcəyini vurğulayıb.
Oktyabrın 28-də 2500-dən çox asayiş keşikçisi Rio-de-Janeyronun şimalındakı favelalarda Braziliyanın “Qırmızı Komandanlıq” dəstəsinin üzvlərinin tutulması əməliyyatında iştirak edib. Hüquq-mühafizə orqanları 100 həbs qərarını icra etmək üçün dəstələrin nəzarətində olan ərazilərə gəlib, lakin şiddətli müqavimətlə üzləşiblər.
