Cənubi Koreyadan Rusiyaya idxal üçün məşhur olan Avropa brendlərinin avtomobilləri 2024-cü ilin əvvəlindən 5-25% bahalaşıb.
Bu barədə Gazeta.Ru-ya RogovMobil şirkətinin təsisçisi Dmitri Roqov məlumat verib.
“İlin əvvəlində əlverişli valyuta şəraiti qiymət artımını qismən məhdudlaşdırırdı, lakin indi onlar başa çatıb. Elə modellər var ki, 20-25% bahalaşıb – bu, BMW 5 seriyası və X5-ə aiddir, Volkswagen Jetta, Passat, Tiguan da bahalaşıb”, – Roqov bildirib.
Onun sözlərinə görə, əvvəllər Rusiyada populyar olmayan “Peugeot” və ya “Mini” kimi brendlərin avtomobilləri az da olsa bahalaşıb. İlin əvvəlindən onlar maksimum 5-7% bahalaşıb.
Valyuta məzənnələrinin dəyişməsi ilə yanaşı, Cənubi Koreyada işlənmiş avtomobillərin qiymətinə rusların müəyyən modellərə olan tələbi də təsir edib. Roqov qeyd edib ki, yerli dilerlər ixrac üçün hansı avtomobillərə tələbatın yüksək olduğunu anlayıb və onların qiymətini xeyli artırıblar.
