Çin və Birləşmiş Ərəb Əmirlikləri bazar ertəsi İsrail və Fələstin arasındakı münaqişə ilə bağlı BMT Təhlükəsizlik Şurasının qapalı iclasının keçirilməsi üçün müraciət təqdim ediblər. Bu barədə TASS dünya təşkilatındakı diplomatik mənbəyə istinadən məlumat yayıb.
Mənbənin verdiyi məlumata görə, Çin və BƏƏ noyabrın 6-da saat 15.00-da (Moskva vaxtı ilə 23.00) BMT Təhlükəsizlik Şurasının iclasının keçirilməsini tələb ediblər. İclasda xüsusilə İsrailin Qəzza zolağının şimalında Fələstin qaçqınları olan Cəbəliyə düşərgəsinə endirdiyi zərbələr və Əl-Şifa mərkəzi xəstəxanası yaxınlığındakı təcili yardım maşınları karvanı müzakirə olunacaq.
Bundan əvvəl İsrailin baş naziri Benyamin Netanyahu bildirib ki, girovlar azad edilmədən Qəzza zolağında atəşkəs olmayacaq, əməliyyat qələbəyə qədər davam edəcək.
Mənbə: TASS
