PTI xəbər agentliyinin məlumatına görə, Hindistanın şərqində sərnişin qatarı fil sürüsü ilə toqquşub, heyvanlardan 8-i ölüb.
Qəzetin məlumatına görə, qəza şənbə günü gecə Assamın Hocai rayonunda baş verib. Sairang-Yeni Dehli Rajdhani Express qatarı yerli vaxtla saat 2:17 radələrində sürüyə çırpılıb. Səkkiz fil ölüb, daha bir heyvan isə yaralanıb.
Şimal-Şərqi Dəmir Yolu (NER) bildirib ki, qəza nəticəsində beş vaqon və lokomotiv relsdən çıxıb. Sərnişinlərdən xəsarət alan olmayıb.
Naqon Rayon Meşə Mütəxəssisi Suxaş Kadam hadisənin Çanjurai rayonunda baş verdiyinə aydınlıq gətirib və əlavə edib ki, meşə işçiləri hadisə yerinə gəliblər.
Camunamux-Kampur hissəsində qatarların hərəkəti müvəqqəti olaraq alternativ marşruta yönəldilib və bərpa işləri davam edir. Sairang-Yeni Delhi Rajdhani Ekspress qatarı Mizoramdakı Sairangı Dehlidəki Anand Vihar Terminalı ilə birləşdirir.
