Kolumbiya prezidenti Qustavo Petro meksikalı həmkarı Klaudiya Şeynbaumdan Mexikoda yoxa çıxan B-King səhnə adı ilə tanınan kolumbiyalı müğənni Bayron Sançesin axtarışında kömək istəyib.
Kolumbiya prezidenti bu barədə özünün sosial şəbəkədəki X səhifəsində bildirib.
Öz ifadəsində Petro “dostu və yoldaşı” Şeynbauma, eləcə də bütün diplomatik korpusa müraciət edərək, Sançes və ortağı Xorxe Herreranın sağ tapılmasını təmin etmək üçün müraciət edib. Kolumbiya prezidentinin sözlərinə görə, bütün Meksika “gözəllik haqqında mahnı oxuyan bu gözəl gəncləri” tapmaq üçün birləşməlidir. Petro Meksika hakimiyyətinin səylərinin nəticə verəcəyinə ümid etdiyini bildirib.
Hüquq-mühafizə orqanları sentyabrın 16-da Sançes və Herrera üçün axtarış elan edib. Kolumbiyalı müğənnini sonuncu dəfə Mexiko şəhərinin mərkəzində görüblər, bundan sonra onunla əlaqə kəsilib.
