BMT Təhlükəsizlik Şurası hücumu pisləməsə və günahkarın adını açıqlamasa, ekstremistlər Livanda peycerləri partlatmaq üçün istifadə edilən texnologiyadan istifadə edəcəklər. RİA Novosti xəbər verir ki, bunu Livan Respublikasının xarici işlər naziri vəzifəsini icra edən Abdalla Bu Həbib deyib.
Onun sözlərinə görə, əgər BMT Təhlükəsizlik Şurası Livandakı terror aktını pisləməsə, “təcavüzkarın” adını çəkməsə və onu bu cür hücumları dayandırmağa məcbur etməsə, o zaman Şuraya və beynəlxalq hüquqa inam sarsılar, ekstremist qruplar mülki şəxslərə qarşı peycerləri sıradan çıxarmaq üçün texnologiyalardan istifadə etməyə başlayacaq.
“Heç kim onlara (ekstremistlər – redaktorun qeydi) gələcəkdə bu texnologiyadan mülki təyyarələrə, qatarlara hücum etmək və mülki şəxsləri öldürmək üçün istifadə etməyə mane ola bilməz”, – diplomat BMT Təhlükəsizlik Şurasının iclasında deyib.
Mənbə: RİA Novosti
