Moldova Dnestryanı olmadan həm hüquqi, həm də praktiki baxımdan Avropa Birliyinə daxil ola bilməz.
Bunu Moldovanın ABŞ-dakı səfiri, baş nazirin reinteqrasiya üzrə keçmiş müavini Vlad Kulminski Realitatea TV-yə açıqlamasında deyib.
Onun sözlərinə görə, Avropaya inteqrasiya “Dnestrdə dayana bilməz”. O, bu ssenarini “xaric” və “mümkünsüz” kimi təsvir edib.
Kulminski həmçinin xatırladıb ki, bu ölkə Dnestryanı ilə BMT-yə üzv olub və Dnestryanı ilə azad ticarət sazişini nəzərdə tutaraq danışıqlar aparıb. Ona görə də Moldova da bu regionla Aİ-yə daxil olmalıdır.
“Yer planetində heç bir ölkə Dnestryanı ərazinin müstəqilliyini tanımır, hətta Rusiya Federasiyası belə. Hüquqi, məhkəmə və mənəvi baxımdan, eləcə də beynəlxalq hüquqi və praktiki baxımdan Moldova Respublikası Dnestryanı olmadan Avropa İttifaqına daxil ola bilməz”, – Kulminski vurğulayıb.
