Moskvanın “Lokomotiv” klubunun sabiq prezidenti Nikolay Naumov Avropa Futbol Assosiasiyaları İttifaqının (UEFA) icraiyyə komitəsinin Rusiyanın gənclərdən ibarət komandalarının qurumun himayəsi altında keçiriləcək yarışlara buraxılışının ləğvi barədə qərarını şərh edib. O, Qazeta.Ru ilə söhbətində UEFA-nı tənqid edərək, bu qərarı biabırçı adlandırıb və təşkilatı amöba ilə müqayisə edib.
“Mən UEFA-nın daha da əyiləcəyindən qorxurdum. Hətta gənclər və gənclərdən ibarət komandaların yarışlardan kənarlaşdırılması ilə bağlı ilkin qərar UEFA-nın nüfuzunu xeyli sarsıtdı. Onlar Pandoranın qutusunu açdılar, çünki hər hansı digər komanda deyə bilər: “Biz ruslarla oynamayacağıq”. Sonra sanki bizi içəri buraxmağa razılaşdılar, amma indi yenə imtina edirlər – bu, UEFA-nın müflisliyindən xəbər verir. Bu, bu gün Avropa futboluna rəhbərlik edə bilməyən qurumdur. Bu bir təşkilat deyil, bir növ amöba, amorf meduzadır. Bu, UEFA-nın çox biabırçı qərarıdır və təkcə Rusiyaya deyil, hər şeydən əvvəl Avropa futboluna və əvvəllər hörmət edilən bu quruma ziyan vurur”, – Naumov bildirib.
2022-ci ilin yazında FİFA və Avropa Futbol Assosiasiyaları İttifaqı (UEFA) Rusiya millisinin, eləcə də bütün Rusiya klublarının bu təşkilatların nəzarətində olan bütün yarışlarda iştirakını dayandırmaq qərarına gəlib. Milli komanda yalnız yoldaşlıq oyunları keçirib. Oktyabrda ruslar Kamerun və Keniya ilə oynayacaq.
Mənbə: TRT sport
