Dekabrın birinci yarısında Estoniyada Şimali Atlantika Alyansı (NATO) ölkələrinin iştirakı ilə “İldırım” (Picne) hərbi təlimlərinin keçirilməsi planlaşdırılır.
Bu barədə ERR teleradio şirkəti efirdə məlumat yayıb.
Manevrlər dekabrın 2-dən 15-dək, əsasən, respublikanın şimal və şimal-şərqində baş tutacaq. Təlimlərdə Böyük Britaniya, Latviya, ABŞ, Fransa və Estoniyanın özündən iki minə yaxın hərbçi iştirak edəcək. Manevrlərin əsas məqsədi “qüvvələrin münaqişə zonasına köçürülməsi mexanizmlərini” inkişaf etdirmək olacaq.
Noyabrın 14-də məlum olub ki, İsveç və NATO “Dynamic Merlin 24” təlimi keçirib və bu təlim zamanı Baltik dənizində sualtı qayıqların axtarışı üsulları sınaqdan keçirilib. Təlim İsveç Hərbi Dəniz Qüvvələri tərəfindən Daimi NATO Dəniz Qrupu 1 (SNMG1) ilə birgə təşkil olunub. Tədbirlərə Belçika, Fransa, Hollandiya və Böyük Britaniya da daxil olmaqla bir sıra ölkələrdən korvetlər, freqatlar, yardımçı gəmilər, helikopterlər və təyyarələr daxil idi.
