Qətər Xarici İşlər Nazirliyinin nümayəndəsi Məcid bin Məhəmməd əl-Ənsari bildirib ki, ölkə Dohada Suriya üzrə Astana formatında görüşün təşkilini təsdiqləyə bilmir, lakin qarşılıqlı fəaliyyətə hazırdır.
Bu barədə TASS məlumat yayıb.
O qeyd edib ki, Qətər həmişə regionda sülhə, münaqişələrin həllinə və gərginliyin azaldılmasına töhfə verə biləcək istənilən səylərə ümid edir. O, həmçinin əlavə edib ki, onların qapıları istənilən mümkün qarşılıqlı fəaliyyət üçün açıq qalır, lakin hazırda Dohada Rusiya, Türkiyə və İranın iştirakı ilə görüşün keçirilməsi planlarının təsdiqi yoxdur.
Bundan əvvəl İranın xarici işlər naziri Abbas Əraqçi bildirib ki, Rusiya, İran, Türkiyə və Qətərin yüksək səviyyəli nümayəndələri dekabrın 7-8-də Suriyadakı vəziyyəti müzakirə etmək üçün Doha Forumu çərçivəsində görüşə bilərlər. İranın Fars agentliyinin Əraqçiyə istinadla verdiyi məlumata görə, görüş xarici əlaqələr idarələrinin rəhbərləri səviyyəsində baş tuta bilər.
