Nankin Universitetinin çinli alimləri informasiyanı işıq vasitəsilə ötürən fasiləsiz rabitə şəbəkəsi hazırlayıblar. O, su, hava və kosmos daxil olmaqla istənilən mühitdə işləyə bilər. Araşdırma “Optics Express” elmi jurnalında dərc olunub.
“Geniş bucaqlı rabitə, məsələn, okeanlarda və göllərdə istifadə oluna bilər, burada sensorlar ətraf mühit haqqında məlumat toplayır və səth şamandıraları ilə əlaqə saxlayır. Məlumatlar daha sonra suyun səthi üzərində simsiz və ya şəhərlər arasında uzun məsafələrə məlumat bağlantıları vasitəsilə göndərilə bilər. Şəbəkə həmçinin modem vasitəsilə internetə qoşula bilər ki, bu da okeanda uzaq bir yerdə ola biləcək insanlara məlumat mübadiləsi üçün magistral şəbəkəyə çıxış imkanı verir”, – tədqiqat qrupunun rəhbəri Yunjin Vanq izah edib.
İnkişafın müəllifləri müxtəlif növ mühitlər üçün dörd işıq spektrindən istifadə ediblər. Su altında məlumatlar mavi şüalarla, səthdə ağ LED-lər vasitəsilə, havada ultrabənövşəyi şüalanma ilə, kosmosda isə infraqırmızı lazerlər vasitəsilə ötürülür. Tədqiqatçılar həmçinin şəbəkəni TCP/IP sxemi əsasında İnternetə simsiz və ya simli çıxışı təmin etmək üçün dizayn ediblər ki, bu da onu Əşyaların İnterneti proqramları üçün faydalı edir.
Mənbə: Optics Express
