ABŞ-ın yeni seçilmiş prezidenti Donald Tramp kriptovalyuta birjası Coinbase-in baş direktoru Brayan Armstronqla görüşəcək.
Bu barədə The Wall Street Journal (WSJ) yazır.
Qəzet qeyd edir ki, Tramp və Armstronqun yeni administrasiyada kadr təyinatlarını müzakirə edəcəyi gözlənilir. Bu, onların ABŞ prezident seçkilərindən sonra ilk görüşü olacaq.
“Keçmiş kriptovalyuta skeptiki olan Tramp bu sənayenin qızğın tərəfdarına çevrildi”, WSJ vurğulayır.
Bu ilin iyulunda Tramp bildirib ki, seçkidə qalib gəlsə, bitkoinlərin milli strateji ehtiyatı yaratmaq niyyətindədir. Onun administrasiyasının siyasəti hökumətin hazırda saxladığı və ya gələcəkdə əldə etdiyi bütün bitkoinlərin 100%-ni özündə saxlamaq olacaq, Tramp bildirib.
