Türkiyə sahillərində neft tankerləri tıxac yaradıbbackend

Rusiya neftinə qiymət tavanı tətbiq edildikdən sonra Türkiyə ərazi sularında, Bosfor və Dardanel boğazlarında lövbər salan 19 neft tankerinə görə tıxac yaranıb.

Bu barədə “Financial Times” gəmiçilik brokerlərinin, neft treyderlərinin və peyk izləmə xidmətlərinin məlumatlarına istinadən yazıb.

Dekabrın 5-də tətbiq edilən qiymət tavanı Rusiya neftini yükləyən tankerlərə neftin qiyməti 60 dollardan yuxarı olduqda Qərbdə daşınan malları sığortalamağı qadağan edir. Məhdudiyyətlər tətbiq edildikdən sonra Türkiyə rəsmiləri neftin sığortalandığı barədə sübut tələb ediblər.

Gəmi brokerlərindən biri ilk tankerin noyabrın 29-da gəldiyini və altı gündür gözlədiyini deyib.

Türkiyə sahillərində gəmilərdəki neftin böyük hissəsi Qazaxıstan mənşəlidir. Qazaxıstan nefti Rusiyaya boru kəməri ilə daxil olur və Qərbin sanksiyalarına düşmür.

Xatırladaq ki, dekabrın 5-də Avropa İttifaqının Rusiyadan neft tədarükünə embarqo tətbiq etmək qərarı qüvvəyə minib (bu dəniz yolu ilə daşınan neft üçün tavan qiymət mexanizmini nəzərdə tutur). Rusiya neftinin tavan qiyməti gələcəkdə qiymətin dəyişdirilməsi ehtimalı ilə 60 dollar müəyyən edilib.

Mənbə: Meduza