Alma, soğan, kapers və yaşıl lobyada olan təbii birləşmə olan kversetin, yaşla əlaqəli bir sıra xəstəliklərin inkişafını yavaşlada bilər. Bu, Jilin Kənd Təsərrüfatı Elmləri və Texnologiyaları Kollecinin alimlərinin gəldiyi nəticədir. Tədqiqatın nəticələri Phytotherapy Research (PhyRes) jurnalında dərc edilib.
Kversetin flavonoid qrupuna aid biokimyəvi maddədir. Təbiətdə bitkinin stressə qarşı müqavimətini artırır, hüceyrə divarlarını gücləndirir və fizioloji prosesləri stimullaşdırır.
Müəlliflər əvvəllər dərc olunmuş tədqiqatların məlumatlarını təhlil edərək, kversetinin açıq şəkildə antioksidan və iltihab əleyhinə xüsusiyyətlərə malik olduğunu aşkar ediblər. Bu birləşmə həmçinin insanlarda toxuma zədələnməsinin qarşısını alan hüceyrə proseslərini tənzimləyir və yaşlanma ilə əlaqəli əsas siqnal yollarına təsir göstərir.
