RT kanalı xəbər verir ki, Dövlət Duması çoxuşaqlı valideynlərə ayda əlavə dörd gün istirahət verməyi təklif edib.
Bu təşəbbüsü deputat Yana Lantratova Rusiya Federasiyasının əmək və əhalinin sosial müdafiəsi naziri Anton Kotyakova ünvanladığı məktubda irəli sürüb. O qeyd edib ki, indi əmək qanunvericiliyində əlil uşağın valideynlərindən birinin ay ərzində dörd əlavə ödənişli məzuniyyət hüququ olması nəzərdə tutulur və bu müddəanın əhəmiyyəti şübhə doğurmur.
Eyni zamanda, Lantratova hesab edir ki, çoxuşaqlı valideynlərin də əlavə istirahət günləri lazımdır. Ona görə də deputatın sözlərinə görə, qanunvericilikdə çoxuşaqlı valideynlərə əlavə ödənişli istirahət günləri hüququnun verilməsini nəzərdə tutan dəyişikliklərə ehtiyac var. Lantratova 18 yaşınadək üç və daha çox uşağı olan işçilərə ayda dördədək əlavə ödənişli məzuniyyət veriləcəyini müəyyən etməyi təklif edir.
Mənbə: Lenta.ru
