Son illər Azərbaycan avtomobil bazarında mühüm dəyişikliklər baş verir. Bu dəyişikliklərin başında Çin istehsalı olan avtomobillərin ölkə bazarına sürətlə daxil olması dayanır. Münasib qiymət, yeni texnologiyalar və zəmanətli satış təklifləri ilə seçilən Çin markaları həm alıcıların, həm də bazarda uzun illərdir fəaliyyət göstərən avtomobil alverçilərinin diqqət mərkəzinə çevrilib. Lakin bu yenilik bəziləri üçün üstünlük olduğu halda, digərləri üçün ciddi narahatlıq mənbəyinə çevrilib.
İctimai.az bu mövzuda hazırladığı məqaləni təqdim edir.
Köhnə modellər bazarda maraqsız qalıb
Əvvəllər ikinci əl bazarda xüsusilə 2005–2015-ci illərə aid modellər böyük tələbat görürdü. Həm yerli, həm də xaricdən gətirilən bu avtomobillər alverçilər tərəfindən yüksək qiymətlə təklif olunur və çox zaman sürətlə satılırdı. Lakin hazırda vəziyyət tamamilə dəyişib. Yeni və münasib qiymətə satılan Çin avtomobilləri ilə müqayisədə, köhnə və istifadə olunmuş avtomobillər həm texniki, həm də funksional baxımdan geri qalır.
Bir vaxtlar 15-20 min manata satılan 10-15 illik avtomobillərə indi alıcı tapmaq çətinləşib. Qiymətlərin yenidən nəzərdən keçirilməsi zərurəti yaranıb, lakin bəzi alverçilər hələ də yüksək qiymətlərdə israr edir. Nəticədə bazarda alqı-satqı səngiyib, durğunluq yaranıb.
Alverçilərin narazılığı artır
Çoxsaylı avtomobil satıcıları yeni şəraitə uyğunlaşmaqda çətinlik çəkir. İkinci əl avtomobillərin dəyər itirməsi, alıcıların Çin istehsalına yönəlməsi və satışların kəskin azalması bu sektorda çalışanları ciddi iqtisadi sıxıntılarla üz-üzə qoyub.
Bazarda fəaliyyət göstərən bir avtomobil alverçisi belə deyir: “Əvvəllər bir avtomobili gətirib 2-3 min manat fərqlə satmaq olurdu. İndi eyni maşın bir aydan çoxdur salonumda qalıb. Alıcılar Çin maşınlarına baxır, kreditlə, zəmanətlə təklif olunanda təbii ki, köhnə maşını kim nə etsin?”
Çin avtomobilləri niyə cəlbedicidir?
Çin avtomobil markalarının Azərbaycan bazarına daxil olması təsadüfi deyil. Şirkətlər bazar araşdırmalarını apararaq, Azərbaycan alıcısının nə istədiyini düzgün təhlil ediblər: münasib qiymət, yanacağa qənaətcil mühərrik, zəmanətli xidmət və müasir dizayn. Üstəlik, kredit və lizinq imkanlarının genişlənməsi də bu avtomobillərə əlçatanlığı artırıb.
Məsələn, 2024 və 2025-ci ilin yeni modellərini 20-25 min manata, kreditlə və zəmanətlə almaq mümkündür. Bu qiymətə alıcı həm yeni, həm də az yanacaq sərf edən, texniki nasazlıq riski aşağı olan avtomobil əldə edir.
Bazarın Gələcəyi Necə Görünür?
Ekspertlər hesab edir ki, yaxın illərdə ikinci əl avtomobil bazarında ciddi transformasiya baş verəcək. Xüsusilə 10 ildən çox yaşı olan və qiyməti real bazar dəyərindən yüksək olan avtomobillərə maraq daha da azalacaq. Alverçilərin bu şəraitə uyğunlaşmaq üçün ya qiymətləri endirməsi, ya da yeni avtomobil satışına keçməsi qaçılmaz görünür.
Eyni zamanda, bu tendensiya avtomobil bazarında şəffaflığın və sağlam rəqabətin artmasına da səbəb ola bilər. Alıcıların daha çox seçim imkanı əldə etməsi və bazarın tənzimlənməsi isə uzunmüddətli perspektivdə müsbət nəticələr verə bilər.
