Peşəkar Psixoloqlar İctimai Birliyinin sədri, psixoloq Səbinə İsmayılovanın Ümumdünya Sağlamlıq Günü ilə bağlı müraciəti
7 aprel – Ümumdünya Sağlamlıq Günü sağlamlığın qorunması, xəstəliklərin profilaktikası və insanların keyfiyyətli səhiyyə xidmətlərinə çıxışının əhəmiyyətini diqqətə çatdıran mühüm gündür.
Sağlamlıq dedikdə yalnız fiziki vəziyyət deyil, insanın psixoloji və sosial rifahı da nəzərdə tutulmalıdır. İnsan gündəlik həyatında stress, emosional gərginlik, narahatlıq və müxtəlif sosial çətinliklərlə qarşılaşa bilər. Bu halların vaxtında nəzərə alınması və zəruri dəstəyin göstərilməsi ümumi sağlamlığın qorunmasında mühüm rol oynayır.
Psixoloji sağlamlıq insanın öz emosiyalarını idarə etməsi, çətinliklərə uyğunlaşması, sağlam münasibətlər qurması və gündəlik fəaliyyətini davam etdirməsi üçün vacib amildir. Psixoloji yardıma müraciət etmək zəiflik deyil, öz sağlamlığına məsuliyyətli yanaşmanın göstəricisidir.
Bu baxımdan, səhiyyə sistemində psixoloji xidmətlərin inkişafı, psixoloq və digər səhiyyə mütəxəssisləri arasında əməkdaşlığın gücləndirilməsi, psixoloji yardımın əlçatanlığının artırılması xüsusi əhəmiyyət daşıyır. Xüsusilə uşaqlar, yeniyetmələr, yaşlılar və həssas əhali qruplarının psixoloji ehtiyaclarına diqqət yetirilməlidir.
Hesab edirəm ki, sağlam cəmiyyətin formalaşması üçün profilaktik maarifləndirmə, erkən müdaxilə və kompleks dəstək xidmətləri genişləndirilməlidir. Fiziki sağlamlıqla psixoloji sağlamlıq bir-birindən ayrılmazdır.
Peşəkar Psixoloqlar İctimai Birliyi olaraq əhalinin psixoloji sağlamlıq barədə məlumatlılığının artırılmasını və peşəkar psixoloji xidmətlərin təşviqini vacib hesab edirik.
Sağlamlığımızı qoruyaq, psixoloji rifahımıza diqqət yetirək!
Səbinə İsmayılova
Peşəkar Psixoloqlar İctimai Birliyinin sədri, psixoloq