Hərbi vəziyyət hadisələrini araşdırmaq üçün yaradılmış xüsusi istintaq qrupunun hüquq-mühafizə orqanlarının əməkdaşları Cənubi Koreya prezidenti Yun Seok Yeolun administrasiyasında axtarışa başlayıblar.
Bu barədə Yonhap agentliyi məlumat yayıb.
Bildirilir ki, təhlükəsizlik qüvvələri Cənubi Koreya Ordusu Xüsusi Təyinatlı Qüvvələr Komandanlığının qərargahına, Milli Polis Agentliyinin qərargahına və Seul polis qərargahına da basqın ediblər.
Dekabrın 3-də Yun Seok Yeol respublikada hərbi vəziyyətin tətbiq olunduğunu elan edib. O, qərarını “Şimali Koreyayönlü qüvvələrin kökünü kəsmək və azad konstitusiya quruluşunu qorumaq” zərurəti ilə izah edib. Eyni zamanda jurnalistlər dövlət başçısının hərəkətlərini onun siyasi rəqiblərinin ona qarşı impiçment proseduru həyata keçirmək cəhdləri ilə əlaqələndiriblər.
