Praqada NATO xarici işlər nazirlərinin qeyri-rəsmi görüşündə Finlandiya tərəfdaşlarını Ukraynaya kömək etmək üçün bərabər maliyyə töhfələri verməyə dəvət etmək niyyətindədir.
Bu barədə TASS məlumat yayıb.
Finlandiyanın xarici işlər naziri Elina Valtonen müvafiq bəyanatla çıxış edib. Onun sözlərinə görə, görüşün əsas məqsədi “qısa, orta və uzunmüddətli perspektivdə Ukraynaya dəstək səviyyəsini artırmaqdır”. Bu, alyans ölkələri arasında “maliyyə yükünün bərabər bölüşdürülməsini” tələb edir. Ümumi məbləğ, məsələn, ÜDM-in ölçüsünə görə bölünə bilər.
Lakin bundan əvvəl, Valtonenin fikrincə, “Kiyevin münaqişədə qalib gəlməsi üçün lazım olan dəstəyin səviyyəsini müəyyən etmək lazımdır”. Nazir qeyd edib ki, silah verə bilməyən alyans ölkələri maliyyə cəhətdən iştirak edə bilər.
