İsveç Kralı XVI Karl Qustav Ukraynaya səfərə gəlib. Bu barədə Ukrayna Prezidenti Volodimir Zelenskinin Telegram kanalında video yayımlandığı bildirilib.
Kadrlarda XVI Karl Qustav və Zelenskinin salamlaşma zamanı əl sıxdıqları görünür. Görüş Lvovda baş tutub. Nəşrdə kralın səfərinin vaxtı və müzakirə olunacaq mövzular göstərilməyib. Yalnızca bildirilir ki, bu, İsveç kralının 14 ildə Ukraynaya ilk səfəridir.
24 fevralda İsveç hökuməti Ukraynaya 25,31 milyon dollar humanitar yardım ayırmaq qərarına gəlib. Hökumət Kanslerliyinin məlumatına görə, ölkə “Ukraynanın dayanıqlığını qoruyacaq və əhalinin ən həssas təbəqələrinə ümid parıltısı verəcək tədbirlər paketi” təqdim edir.
Hökumətin məlumatına görə, İsveçin Ukraynaya ümumi hərbi dəstəyi 11,37 milyard dollar, mülki dəstəyi isə 2,7 milyard dollar təşkil edir.
