Beynəlxalq Diabet Federasiyası (BDF) on illərdir alimlər arasında müzakirələrə səbəb olan beşinci tip diabetin mövcudluğunu rəsmi olaraq tanıyıb. Təşkilat ÜST-nü onu Beynəlxalq Xəstəliklər Təsnifatına daxil etməyə çağırıb.
Bu, sözdə qidalanma pozğunluğu ilə əlaqəli diabetdir. Mütəxəssislərin hesablamalarına görə, bu, əsasən xroniki qidalanmanın yayıldığı Asiya və Afrika ölkələrində 25 milyona qədər insana təsir göstərə bilər.
Bu diabet növü ilk dəfə 1955-ci ildə təsvir edilmiş, lakin sonradan faktiki olaraq unudulmuşdu. 20-ci əsrin sonlarında ÜST məlumat çatışmazlığı səbəbindən onu təsnifatından çıxardı və o vaxtdan bəri alimlər onun xəstəliyin ayrı bir forması kimi mövcud olub-olmadığını müzakirə edirlər. İndi isə toplanmış tədqiqatlar bu ideyanın yenidən canlanmasına imkan verib.
Ekseter Universitetinin tədqiqatçısı Kreyq Bil qeyd edib ki, “Diabetin spesifik növünü anlamaq düzgün müalicəni seçmək üçün çox vacibdir”.
