Qırğızıstan hakimiyyəti BMT ilə əməkdaşlıq çərçivəsində yaşıl enerji və ətraf mühitin mühafizəsini inkişaf etdirmək niyyətindədir.
TASS xəbər verir ki, bunu respublikanın xarici işlər naziri Jeenbek Kulubayev Nyu-Yorkda BMT-nin baş katibi Antonio Quterreşlə görüşündə deyib.
“Nyu-Yorka işgüzar səfəri zamanı nazir Kulubayev BMT-nin baş katibi ilə görüşüb və o, təşkilatın beynəlxalq sülh və təhlükəsizliyin təmin edilməsi, eləcə də qlobal sosial-iqtisadi və iqlim problemlərinin həlli istiqamətində səylərini dəstəklədiyini bildirib”, – Qırğızıstan Xarici İşlər Nazirliyinin mətbuat xidmətindən bildirilib.
Kulubayev ölkənin davamlı inkişaf məqsədlərinə sadiqliyini təsdiqləyib və respublikanın prioritet istiqamətləri, o cümlədən “dağ gündəliyinin” təşviqi, yaşıl iqtisadiyyatın inkişafı və ətraf mühitin mühafizəsi barədə danışıb. O, həmçinin beynəlxalq arenada bu məsələlərdə BMT-dən dəstək istəyib.
